|
作者是 editor
|
|
週五, 22 一月 2010 12:38 |
《阿凡達》剛剛打破咗《鐵達尼》嘅香港電影票房紀錄，全3D拍攝應記首功，但係聽講有啲朋友唔多習慣3D畫面，睇到頭暈眼花，甚至台灣啱啱有人睇到中風。睇完3D電影，今年仲會出埋3D電視，戲院暈完返屋企再嘔過，唔通要逼自己睇到唔嘔為止？今日就等小記請來眼科專科袁尚清醫生，為大家解答各種對於3D睇法嘅謬誤啦！
 問：睇3D電影會頭暈，係身體孱弱？
答：連3D都睇唔到真係孱，食多啲枸杞補吓眼啦！
醫生意見：3D影像原理是將兩眼視點分離，兩隻眼接收不同影像。一般人或多或少都會有隱性斜視，平時可用眼部肌肉矯正，但當觀看3D影像時，就要比較用力去維持眼球位置，所以當長時間觀看就有機會導致頭痛、眼痛、短暫複視甚至作暈作嘔的徵狀。平常係好難察覺隱性斜視嘅問題，未睇過3D電影都唔知頂唔頂得住，但同身體孱弱無關。
問：睇《阿凡達》中途見頭暈，應該休息一下？
答：戲飛咁貴兼且訂咗咁耐先有得睇，當然唔好錯過任何一個鏡頭啦！
醫生意見：一般人連續睇1~1.5小時3D影片應該唔會有事，但連續睇3小時就可能令問題惡化；所以當覺得眼部肌肉被扯緊，就最好休息一下。在戲院睇電影時全神貫注未必行得開，但將來睇3D電視，廣告時候最好都係行開吓或望吓其他景物。
問：邊類人睇唔到3D電影或電視？
答：色盲嘅人咪睇唔到囉！
醫生意見：由於3D影像需要兩隻眼都擁有近似眼力先能夠睇得見，如果其中一隻眼的視力較差，如患有弱視、失明、嚴重斜視等問題，都一律接收唔到3D影像；反而色盲與否，對收看3D影像冇太大影響。
問：坐幾遠睇3D電影或電視最好？
答：當然坐得遠啲比較好，冇咁易暈！
醫生意見：3D電影或電視嘅觀看距離其實同現時觀看一般電影或電視冇分別，只是左右眼各觀看不同影像，所以只要唔好太近睇3D影像就可以。
問：睇3D電影或電視會唔會壞眼？
答：大人嘅話冇問題，但細路仔最好唔好畀佢哋睇！
醫生意見：睇3D畫面而導致不適嘅情況只屬暫時性，理論上休息過後就冇事；但如果每日都長時間睇3D影像的話，有可能會令斜視問題惡化。至於小朋友由細開始睇3D影像會唔會影響眼球發育，暫時仍未有臨床實驗證明，不過都唔建議小朋友長時間睇3D電視，以一般LCD電視每日最多睇3~5小時去衡量，3D電視嘅觀看時間應再短一點。
3D電視用甚麼技術？
現行3D顯示有3種技術，而由多間大廠主導嘅3D電視，將會以提升顯示頻率一倍及配合加入黑屏裝置的主動式快門眼鏡（Active Shutter Glasses）使用，能真正播放出Full HD 3D影像；用被動式眼鏡（Passive Glasses）嘅3D電視或3D屏幕，畫面線數只剩低一半，畫質相對較差。
 有咩3D內容好睇？
幾間廠商都預期會在推出3D電視後，緊接推出3D Blu-ray影碟機，可以在屋企欣賞到3D電影，Sony亦公布將推出3D世界盃影碟；另外，今年內會有十套八套3D遊戲登場（包括已推出的《Avatar: The Game》）。至於2D嘅電視廣播節目亦可透過電視機內的轉換器，將2D影像升級為「3D」，但效果當然遜於真3D影像。
資料來源:東方日報 |
