嚟到11月，又係大飽口福嘅時候，皆因一年一度嘅美食節又嚟啦！到底今年澳門美食節有咩特色同驚喜？HappyMacao第一時間帶你去食過番尋味！
澳門美食節今年已經嚟到第13屆，一如以往，美食節劃分為「中式美食街」、「歐陸美食街」、「亞洲美食街」、「風味美食街」和「甜品街」，匯聚逾百本地特色飲食商號，相信大家都熟識不過，就不多作介紹了。
今屆的焦點在於首次邀請到龐大的泰國隊伍來澳！喜歡食泰國嘢嘅朋友有福喇！設於西灣湖下層的「泰國村」，有來自泰北、泰東北、泰中及泰南超過三十家泰國特色美食商號，匯聚泰國四大菜系的魅力小食。
泰國村受歡迎
放眼所見，芒果糯米飯、椰子脆餅、醃雞腳、泰式米皮卷、泰式沙律、甚至叫不出名字的……總之你見過同未見過的泰國美食都有。由於係泰國當地人主理的正宗泰菜，小記試過，有啲都真係幾辣架！不過的確好惹味，泰菜嘛，食多啲都唔驚肥啦。
提起泰國，除咗美食，你仲會諗起啲咩？時尚衣飾？泰式按摩？「泰國村」都可以滿足到你！除咗美食攤位外，亦有售賣絲巾、飾品的攤位；現場仲設有泰式按摩，可以按頸部、肩部及背部；由於11月係泰國傳統「水燈節」，大家仲可以應吓節去西灣湖放水燈添呀！嘩！好似去咗泰國咁！有得食有得玩有得嘆，仲可以買埋手信──榴槤糖、米脆等泰國特色小食返屋企慢慢品嚐。
泰式按摩
披肩 泰國小食
放水燈體驗泰國傳統節日
適逢「澳門格蘭披治大賽車」60周年鑽禧，今屆澳門美食節採用大賽車為設計概念，以「美食賽車巡禮」為口號，現場有別具特色的賽車展示、迷你版大賽車控制塔，仲有紙板頒獎台，自問勁嚓得嘅話，就要企去No.1度影返張相留念喇！
第十三屆澳門美食節
日期：11月8日至24日
時間：星期一至四 5pm - 11pm; 星期五至日 3pm - 12am
地點：西灣湖廣場
